كفايه يا ريس
من الاول...
انا مواليد إتنين و تسعين
ويعنى علينا انا وجيلى مستائين
طبعا يا جماعه مستائين ولا انتوا مش شايفين
الوضع الى عايشين فيه وكأننا ميتين
الريس اديله من قبل ما نتولد بعشر سنين
ماسك فى الكرسى وكانه موصى النجارين
يحطوله على الكرسى غره وبلاك ويثبته بمسمارين
قاعد يجيب وزير ويحط وزير ويغير مستشارين
واحنا يا عينى غلابه ولا دريانين
غلط مره وادى للجنزورى قرار التعيين
فى المغاره قصدى الوزاره وقاله اهبرلك هبرتين
فلما الراجل رفض وقال اكلها بالحلال يا ريس المصريين
قال الريس لالا غيره دا من الرجعيين
هتولنا واحد مودرن ويكون عنده خبرة السفاحين
فجبولنا المعلم عاطف عبيد من الشمامين
بصراحه الراجل ظبط البلد....بس من الكوكايين
حب يظبط الشعب ويخلينا مسطولين
ولما بدأ يتكشف قال للريس تمام
يا ريس
اروح استخىوكأنى من المستقالين
وبعد ما المعلم هبره هبرتين
نسناه وقولنا ربنا يسترها على الجايين
فجبولنا احمد نظيف بطوله المترين
واقف يتحنطر وامال يروح شمال ويمين
محتار الراجل مش عارف يهبر من الغلابه ولا المساكين
انا شايف ان كفايه لحد كدا يا معلمين
لا فى شغل ولا وظايف وبيرسموا على التموين
هيفضلوا ورنا وحده وحده لحد ما نقول مش عايزين
ياريس حرام عليك وكفايه ولا احنا عشان ساكتين!!
يا خوفى لتكون بترسم انك تدى الكرسى لحد من الولدين
اوعى يا جمال ولا انت يا علاء تسمعوا كلام بابا..والله شكلكم نويين
وهتخربوها اكتر ما هى خربانه وتذودوها حبتين
بس بصوا..انتوا فى الزحمه كدا كل واحد ياخد كرسى وكأننا مش شايفين
بس بلاش الكرسى الكبير دا لواحد من المحترمين
بقولك ايه....ما تيجى نتكلم كلام العاقلين
هو بيودى فى داهيه صحيح ..ههههه يا راجل ما احنا كدا كدا ضايعين
بس هنتكلم فى ايه ولا ايه؟؟؟ ما كلنا عرفين بس خايفين
عارفين حادثة العباره و تجارة الاعضاء وكمان حادثة القطرين
فى الحادثه الاولى قالوا القبطان هرب ومش عرفين راح فين!!
والتانيه بتاعت (بنى مزار) قالوا دا مجنون من المجانين
بس الظاهر دا نوع جديد من المجانين الى بيبحوا ياكلوا حلم البنى ادمين
والتالته قالوا دا واحد كان بيعمل شاى من المسافرين
فمعرفش يقفل الانبوبه فانفجرت فى الى راكبين
انا عارف انه كلام ناس جهلين
بس غصب عننا لازم نصدق وكمان نبقى شهدين
والله يا جماعه دا كتير علينا..ولا احنا عشان مساكين
حتى رغيف العيش بقى صعب وغلى تمنه للضعفين
كفاااااااااااايه يا ريس ...احنا تعبنـا وبنقول بدل الاه اهين
انا مش عارف دى حكومه ايه دى. فى الغلابه بس فالحين
ماشيين ورا امريكا..وكل مايغلط الريس ويبص للشعب..بوش يقوله try again
Try again يا حسنى وانا والله ازود عليك الدين
كل شويه ديون مصر ديون مصر امال ايراد الضرايب والميه والنور بيروح فين!!!
سيبين الحيتان الكبيره تاكل فى الشعب وبيبصوا ولا كأنهم شايفين
قعدين يمسكوا فى حركة كفايه وفى المعارضه وفى الاخوان المسلمين
طب فين يا ريس حرية الراى ..ولا انت عايز تأمر واحنا وراك نقول امــــين
الشباب كلها زهقت من الوضع دا..
واتغربوا وفى غربتهم متبهدلين
بصراحه انا اتخنقت منك يا راجل ..وكمان كل المصريين
فلحين يقولوا الريس حققلنا الامن والامان واحنا فى بيوتنا مرتحين
بلا وكسه..امن ايه وامان ايه دا احنا من اليأس تعبنين
يا ريس دا احنا سمعتنا عند باقى العرب بقيت فى الطين
فرحنين باننا اقوى جيش فى العرب طب وبعدين.؟؟؟!!!
ما بغداد اهى دمروها وبيرسموا على لبنان وكل يوم بيموتوا فلسطنيين
فين احنا من دا هيبقى لا حياة ولا شهاده ..خربانه من النحيتين!!
يالله ارحمنا من الى احنا فيه دا ...ما تقولوا امين!!!!!!
ولاانتوا مش شيفين
الوضع الى احنا فيه وكأننا ميتين
انا تعبت من الكلام والكتابه...لانهم مش سامعين
مش سامعين بمزاجهم وكيفهم وعملين انهم مسطولين
طيب يا حكومه...خليكم كدا وخلينا احنا الطيبين
طيبيبن قال!!!! ههههههههههههههه قصدى المكسورين
كفايه كدا عشان خاطر الراجل ابو نجمتين
ليحطنى فى دماغه ويلبسنى الاسوره ام فتحتين
وبعدين انا مش عايز اتقل على اصحابى لسه هيجبولى عيش وحلاوه..ودالجنيه دلوقتى ميسويش قرشين
كفايه لحد كدا وكملى بكائك يا عين
الأحد 13 يوليو 2008, 4:30 am
